“INNOLAND” İnkubasiya və Akselerasiya Mərkəzinin “Bakcell”lə birgə elan etdiyi 1-ci İnkubasiya proqramına seçimlər başa çatıb.

Münsiflər heyətinin qarşısında öz layihələrini təqdim edən 5 startapdan 3-ü yüksək bal toplayaraq proqramda iştirak etmək haqqı qazanıb.

Seçimlərdən uğurla keçən “Bon.az”, “Towaves” və “Face Ads” komandaları “INNOLAND“də öz layihələrini reallaşdırmaq şansı əldə ediblər.

“Face Ads” sosial media problemlərini həlletmə yönümlü platformadır.

“ToWaves” ortaq maraq və oxşar fikirləri olan insanları bir araya gətirən platformadır.

“Bon.az” istifadəçilərin onlayn alış-verişdən “cashback“ əldə etməsi üçün yaradılan sistemdir.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “INNOLAND” İnkubasiya və Akselerasiya Mərkəzində akselerasiya proqramını uğurla başa vurmuş startapçılarla görüş - “Demo Day” təşkil olunub.

Tədbirdə dövlət qurumlarının və özəl şirkətlərin rəhbər vəzifəli şəxsləri iştirak ediblər.

“INNOLAND” İnkubasiya və Akselerasiya Mərkəzi startapların Azərbaycan və beynəlxalq bazarda inkişafına kömək məqsədi ilə intensiv akselerasiya proqramı həyata keçirir. 

“Demo Day”də aqro, təhsil, maliyyə, İKT, loqistika, turizm kimi fəaliyyət istiqamətlərini əhatə edən, ümumilikdə 8 startap çıxış edib. 

“Mr.Bee”, “Onepoint”, “Nextsale”, “11Delivery”, “Triple”, “Vriendly”, “Whelp” və “Neuroil” komandaları investorlar qarşısında öz təqdimatlarını edib.

Startapçılar çıxışlarında “INNOLAND” İnkubasiya və Akselerasiya Mərkəzində keçdikləri 12 həftəlik akselerasiya proqramı ərzində layihələrin necə inkişaf etdiyi, hazırda layihələrin hansı mərhələdə olduğu, gələcək hədəfləri və zəruri olan investisiya ehtiyacları haqqında məlumat veriblər.

Tədbir çərçivəsində bir sıra şirkətlər məzun startapçılarla maraqlanıb və investisiyaların yatırılması ilə bağlı danışıqlara başlanılıb.

“Demo Day”in keçirilməsində məqsəd maliyyə ehtiyacı olan startaplar və sərmayə qoymaq istəyən investorları bir araya gətirmək və tərəflər arasında sağlam  mühitdə davamlı əlaqələrin qurulmasına dəstək göstərməkdir

Azərbaycan Respublikası Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin dəstəyi ilə Azərbaycan İnternet Forumu tərəfindən ölkədə innovasiya fəaliyyətinin təşviqi, paytaxt və region gənclərinin yeni ideyalarının üzə çıxarılması, startap mühitinin yaxşılaşdırılması və innovasiya ekosisteminin bütün üzvləri üçün əlverişli mühitin yaradılması işinə dəstək olmaq məqsədilə “Startup Günləri” tədbirləri keçirilir.

“Startup günləri” ölkədə internet biznesin, innovasiyaların, startap hərəkatının güclənməsinə, maarifçilik işlərinin təşkilinə, startapçıların formalaşmasına və şəbəkələşməsinə xidmət edir. Ümumilikdə 10 təhsil müəssisəsində keçirilməsi planlaşdırılan “Startap günləri” tədbiri 3 ay boyunca davam edəcək və sonda “Startap Azərbaycan” yekun konfransı keçiriləcəkdir. Qalib komandalar ideyalarını biznesə çevirmək üçün “INNOLAND" İnkubasiya və Akselerasiya Mərkəzində fəaliyyətlərini davam etdirəcəklər.

İlk “Startup günləri” tədbiri 12-13 aprel tarixlərində Azərbaycan Texniki Universitetində keçirilib. “Startup günləri”nə qatılmaq üçün 117 tələbə qeydiyyatdan keçib və ilk mərhələdə 20 ideya, növbəti mərhələdə isə 5 ideya seçilərək komanda şəklində formalaşıb və növbəti mərhələyə keçib. Mentorların dəstəyi ilə 5 komanda öz ideyalarının biznes planını hazırlayaraq jürilərə təqdim ediblər. Kənd təsərrüfatı texnikasının paylaşılmasına dair “Agro Share” layihəsi “Startap günləri” yarışının qalibi seçilib. Sonda qaliblərə diplom və hədiyyələr təqdim edilib.

Martın 17-də Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində olan “İnnovasiyalar Mərkəzi” MMC (İNNOLAND) və “Yeni Fikir” MMC arasında anlaşma memorandumu imzalanıb. Memorandumun məqsədi ölkəmizdə və regionda texnologiya startapları üçün sahibkarlıq ekosisteminə dəstək göstərmək və inkişaf etməkdə olan (və ya digər) texnologiya sahibkarlarının ehtiyaclarına xidmət göstərən yüksək səviyyəli tərəfdaşlığın həyata keçirilməsidir.

Sənəddə texnologiya sahibkarlığının formalaşması və inkişafı ilə yanaşı, biznes təşəbbüskarlığının gücləndirilməsi ilə bağlı əməkdaşlıq məsələləri də öz əksini tapır. Belə ki, anlaşma memorandumun istiqamətlərində ölkəmizdə innovasiya ekosisteminin, eləcə də biznes təşəbbüskarlığının qurulması və inkişafına hesablanmış məqamlar öz əksini tapır.

Xatırladaq ki, “İnnovasiyalar Mərkəzi” MMC (İNNOLAND) ölkəmizdə və regionda innovasiya ekosisteminin qurulması, eləcə də texnologiya sahibkarlığının (startapların) inkişaf etirilməsi üçün, fəaliyyət strategiyasına uyğun olaraq, yerli və beynəlxalq təşkilatlarla əməkdaşlıq edir. Bu cür təşkilatlardan biri kimi "Yeni Fikir" MMC Azərbaycanda intellektual xidmət sektorunda fəaliyyət göstərən, həmçinin startap mədəniyyətinin formalaşmasında özünəməxsus rola malik olan şirkətlərdəndir. Belə ki, bu il altıncı dəfə baş tutan "Yeni Fikir" startap müsabiqəsi "Yeni Fikir" MMC tərəfindən, Bakı Mühəndislik Universitetinin təşkilati, BP şirkətinin maliyyə dəstəyi ilə həyata keçirilir. "Yeni Fikir"şirkəti eyni adlı startap müsabiqəsinin təşkilində “İnnovasiyalar Mərkəzi” MMC (İNNOLAND) ilə əməkdaşlıq edir. Müsabiqədə qalib gələcək 5 startap layihəsinin inkişafı da İNNOLAND İnkubasiya və Akselerasiya Mərkəzində dəstəklənəcək.

“Youth Inc.” Sahibkarlıq Proqramı və "INNOLAND" İnkubasiya və Akselerasiya Mərkəzi arasında qarşılıqlı tərəfdaşlıq və əməkdaşlıq memorandumu imzalanıb.

Memorandumu “Youth Inc.” Sahibkarlıq Proqramının koordinatoru Zaur Ünsizadə və “INNOLAND” İnkubasiya və Akselerasiya Mərkəzinin direktoru Məmməd Kərim imzalayıblar.

Memorandum hər iki mərkəzin tədris və praktiki metodikalarının, gənc ideya sahibləri və startapçıların qarşılıqlı mübadiləsi və inkişafı üçün nəzərdə tutulub.

Memoranduma əsasən təcrübə və istedad mübadiləsi ilə yanaşı, birgə demo turlar, təlimlər də təşkil olunacaqdır.

"INNOLAND" İnkubasiya və Akselerasiya Mərkəzinin nümayəndə heyəti Macarıstanda keçirilən "NGO Digitalization" tədbirində iştirak edib.

Tədbirdə "INNOLAND"in direktoru Məmməd Kərimov spiker qismində çıxış edib.

Həmçinin nümayəndə heyəti Budapeşt, Brüsel və Berlin şəhərlərində təşkil olunmuş tədbirlərdə startap ekosisteminin istirakçıları ilə görüşlər keçiriblər.

10 mart 2019-cu il tarixində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “INNOLAND” İnkubasiya və Akselerasiya Mərkəzi və Tech Academynin birgə təşkilatçılığı ilə Azərbaycan Hadoop istifadəçilər qrupunun görüşü keçiriləcək.

Big data texnologiyalarının tətbiq sahələri, yeni nəsil datawarehouse sistemləri, Data Analitika mərhələləri və bir çox əhəmiyyətli mövzuların müzakirə olunacağı görüşdə tanınmış xarici və yerli mütəxəssislərin iştirakı nəzərdə tutulur.

Tədbirin spikerləri ADA Universitetinin Data Analytics mərkəzinin rəhbəri Abzetdin Adamov, Türkiyədə KOMTAŞ məlumatların idarəolunması mərkəzinin Big Data üzrə analitiki Zekeriyya Beşiroğlu və Azərbaycan Oracle istifadəçilər qrupunun rəhbəri, “Oracle ACE Director” mükafatın sahibi Kamran Ağayev olacaqlar.

“INNOLAND” İnkubasiya və Akselerasiya Mərkəzində “SUP” Startap Akseleratorunun qış akselerasiya proqramının iştirakçıları olan “Nextsale” və “Whelp” startaplarına toxum investisiyaları verilib.

Həmin startaplara qoyulan investisiya “Azfinans” İnvestisiya Şirkəti, “Next Step” İnnovasiya Mərkəzi və “Xəzər Vençurs” şirkətinin birgə tərəfdaşlığı ilə həyata keçirilib.

10 yanvar 2019-ci il tarixində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “INNOLAND” İnkubasiya və Akselerasiya Mərkəzi, “Next Step” İnnovasiya Mərkəzi və SUP Startap Akseleratoru arasında Anlaşma Memorandumu imzalanıb.

Memorandum inkubasiya və akselerasiya proqramlarının təşviqi, kovorkinq xidmətlərinin göstərilməsi, startaplar üçün təlim proqramlarının keçirilməsi üzrə birgə əməkdaşlığı əhatə edir. Həmçinin yerli və xarici investorları cəlb etmək üçün məlumat mübadiləsinin aparılması, digər qarşılıqlı tədbirlərin təşkili fəaliyyət istiqamətlərinə daxildir.

Tədbirdə inkubasiya xidmətinin ölkəmizdə dayanıqlı startap ekosisteminin qurulmasındakı əhəmiyyəti, həmçinin akselerasiya xidmətinin ölkə hüdudlarından kənarda yeni milli startap brendlərinin formalaşmasındakı rolu qeyd edilib.