“Gələcək üçün bacarıqlar” layihəsinin V “TUSİ” İnkubasiya proqramına qeydiyyat davam edir.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi” tərəfindən həyata keçirilən “Gələcək üçün bacarıqlar” layihəsinin V “TUSİ” inkubasiya proqramına qeydiyyat davam edir. Proqramın əsas məqsədi innovasiya sahəsində kadr potensialının gücləndirilməsi, təhsildə innovativ fəaliyyətin təşviqi və tələbələrin startap ekosisteminə inteqrasiyasının təmin edilməsidir. Layihə çərçivəsində gənclərin innovativ ideyalarının inkişafına əlverişli şərait yaradılır, onların ixtiraçılıq və startap fəaliyyətinə istiqamətləndirilməsi prioritet istiqamətlər kimi müəyyən olunub. Proqram iştirakçılara ideyaların sistemli şəkildə formalaşdırılması, biznes modelinin qurulması, bazar araşdırması aparılması, məhsulun inkişafı və effektiv təqdimat bacarıqlarının əldə edilməsi üçün geniş imkanlar təqdim edir. V “TUSİ” inkubasiya proqramı 10 əsas mövzu və 34 alt modulu əhatə edən intensiv təlim proqramı əsasında həyata keçirilir. Təlimlər praktiki yanaşma üzərində qurulub və iştirakçıların real startap ideyaları üzərində işləməsinə, innovasiya ekosisteminə daha effektiv inteqrasiya olunmasına şərait yaradır. Proqramda iştirak etmək istəyən şəxslər https://gub.icenter.az/home linkinə daxil olaraq müraciət formasını doldura bilərlər. Qeydiyyat üçün son tarix 12 aprel 2026-cı ildir. İnnovativ ideyaya sahib olan və onu real layihəyə çevirmək istəyən bütün tələbələr proqramda iştirak etməyə dəvət olunur. 2021-ci ildən bu günədək layihə çərçivəsində 18 ali təhsil müəssisəsi ilə əməkdaşlıq qurulub. Universitetlərdə hazırlanmış 130-dan çox mentora təlimlər kecirilib. 3 mindən çox tələbə tərəfindən 300-dən artıq startap ideyası təqdim olunub. Bunlardan 45 startap komandası seçilərək “Demo Day” tədbirlərində layihələrini investor və ekspertlərə təqdim ediblər. “Gələcək üçün bacarıqlar” layihəsi çərçivəsində formalaşmış startaplardan 4-ü ümumilikdə 310 000 AZN həcmində investisiya cəlb edib.

"Yaşıl Dünyanı Yarat! - ASAN İnnovativ Həllər Hakatonu 3" layihəsinə start verilib.

Layihənin ilk günündə “INNOLAND” İnkubasiya və Akselerasiya Mərkəzinin rəhbəri Nicat Əmiraslanov tərəfindən "İdeya generasiyası" mövzusunda təlim baş tutub.

Sonda iştirakçılar komanda şəkilində öz ideyaları ilə bağlı müzakirələr edib.

Hakaton "INNOLAND" İnkubasiya və Akselerasiya Mərkəzi və ASAN İnnovativ İnkişaf Mərkəzinin dəstəyi, "ASAN Könüllüləri" Təşkilatının təşkilatçılığı ilə həyata keçirilir.

Startapların “biz artıq akselerasiya mərhələsindəyik” dediyini eşitmisiniz?

Bəs nə deməkdir akselerasiya? Akselerasiya — ideyasını artıq sınamış və böyüməyə hazır olan startapların sürət qazanma mərhələsidir.

Bu mərhələdə komandalar:

 investorlarla tanış olur

 bazar strategiyalarını gücləndirir

 satış və marketinq planlarını təkmilləşdirir

mentor dəstəyi ilə daha real hədəflərə fokuslanır

Sadə desək, akselerasiya startapın “başlamaq” deyil, “böyümək” üçün hazırlaşdığı andır.  Sizcə, bir startap üçün bu mərhələdə ən önəmli amil hansıdır — mentorluq, bazar strategiyası, yoxsa investor dəstəyi?