Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “INNOLAND” İnkubasiya və Akselerasiya Mərkəzində akselerasiya proqramını uğurla başa vurmuş startapçılarla görüş - “Demo Day” təşkil olunub.

Tədbirdə dövlət qurumlarının və özəl şirkətlərin rəhbər vəzifəli şəxsləri iştirak ediblər.

“Demo Day”də bir neçə fəaliyyət istiqamətini əhatə edən, ümumilikdə 12 startap çıxış edib. 

“INNOLAND”in “Bakcell”lə birgə həyata keçirdiyi 1-ci İnkubasiya proqramından "Fonibo", "Bon.az" və "Towaves" startapları, “AzerGold QSC” ilə birgə həyata keçirdiyi Akselerasiya proqramından "Join 2b2", "Buqelemun", "Təmiz hava" və "Günəş Bioqaz" startapları və “Bank Respublika” ilə birgə həyata keçirdiyi Akselerasiya proqramından "Bank off", "Paylink", "Fintrack", "One Point" və "Dama Dama" startapları investorlar qarşısında öz təqdimatlarını edib.

Startapçılar çıxışlarında “INNOLAND” İnkubasiya və Akselerasiya Mərkəzində keçdikləri inkubasiya və akselerasiya proqramı ərzində layihələrin necə inkişaf etdiyi, hazırda layihələrin hansı mərhələdə olduğu, gələcək hədəfləri və zəruri olan investisiya ehtiyacları haqqında məlumat veriblər.

“Demo Day”in keçirilməsində məqsəd maliyyə ehtiyacı olan startaplar və sərmayə qoymaq istəyən investorları bir araya gətirmək və tərəflər arasında sağlam  mühitdə davamlı əlaqələrin qurulmasına dəstək göstərməkdir

21-26 noyabr tarixlərində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin "INNOLAND" İnkubasiya və Akselerasiya Mərkəzinin təşkilatçılığı ilə keçirələcək "StartupFest 2019"a həsr olunmuş mətbuat konfransı təşkil olunub.

Dövlət Agentliyinin sədr müavini Ceyhun Salmanov çıxışında bildirib ki, "StartupFest” gənc texnologiya sahibkarlarını, “Angel” investorları, korporasiyaları, dövlət qurumlarını, universitetləri, media və müxtəlif ölkələrdən gələn beynəlxalq qonaqları bir araya gətirəcək.

Diqqətə çatdırılıb ki, festival çərçivəsində “Techstars Startup Fintech”, “DevopsDays”, “FUN Baku”, “Product Hunt Meetup”, “TEDx”, “World E-Commerce Forum Eurasia Baku 2019” kimi beynəlxalq tədbirlər təşkil olunacaq. Bakı və Gəncə şəhərlərini əhatə edəcək festival çərçivəsində Azərbaycan, Belçika, Macarıstan, Türkiyə, Gürcüstan, ABŞ və Ukraynadan olan spikerlər öz təcrübələrini bölüşəcəklər.

Tədbirin əsas məqsədi təcrübə mübadiləsinə imkan yaratmaqla Azərbaycanda startap ekosisteminin oyunçularını bir araya gətirmək, ekosistemə müsbət təsir göstərmək və inkişafa təkan verməkdir.

6 iyun tarixində "INNOLAND" İnkubasiya və Akselerasiya Mərkəzində baş tutan görüşdə "Mindrock Capital"ın İnvestisiyalar şöbəsinin rəhbəri, vençur kapitalist Ülvi Rəşid öz təcrübəsini bölüşüb.

Tədbir zamanı iştirakçılara spiker tərəfindən "Maliyyələşdirilə biləcək formaya düşmək" mövzusu haqqında geniş məlumat verilib. Görüşdə, həmçinin "Silikon Vadisində vençur kapitalı mənzərəsi və onun inkişafı", "VC-lər təsisçilərlə görüşərkən nə axtarırlar?", "VC təsdiq qutusu və qərar qəbul etmə sxemi" mövzularında müzakirələr aparılıb.

Qeyd edək ki, tədbir ingilis dilində baş tutub.