Vətəndaşlara Xidmət və Sosial İnnovasiyalar üzrə Dövlət Agentliyinin “INNOLAND” İnkubasiya və Akselerasiya Mərkəzinin təşkilatçılığı ilə Şamaxıda “Hackathon”a start verilib.

Tədbirin ilk günü Azərbaycan Beynəlxalq Bankının nümayəndəsi Hamlet Məmmədov iştirakçıları “Startap nədir?”,  “Startap ideyasını necə formalaşdırmaq olar?”,  “Bazar araşdırması”, “Təqdimat bacarıqları” kimi əsas təşəbbüskarlıq anlayışları ilə tanış edib.  

Növbəti gün iştirakçılar komandalara bölünərək onlara həvalə edilmiş layihələr üzrə “Hackathon” zamanı əldə etdikləri bilikləri tətbiq etməyə çalışacaqlar.

Region gənclərinin iştirakı ilə keçirilən “Hackathon” ümumilikdə 2 gün davam edəcək.

Sonda qalib komandalar Şamaxı "ASAN xidmət"də yerləşən “INNOLAND” İnkubasiya və Akselerasiya Mərkəzində 6 aylıq inkubasiya proqramı keçmək haqqı qazanacaqlar. Bununla yanaşı qalib komandaların təsisçiləri 2020-ci ildə Türkiyədə keçiriləcək “Startup Turkey” tədbirinə qatılmaq şansı əldə edəcəklər.

Şamaxı şəhərində “Hackathon”un keçirilməsində məqsəd region gəncləri arasında startapların təşviqi, mövcud ideyaların dəstəklənməsidir.

Kibertəhlükəsizlik həftəsi çərçivəsində kiber startapların təşviqi məqsədi ilə "INNOLAND" İnkubasiya və Akselerasiya Mərkəzində Nəqliyyat, Rabitə və Yüksək Texnologiyalar Nazirliyinin təşəbbüsü ilə Kibertech startapçıları və kibertəhlükəsizlik üzrə ekspertlər ilə görüş keçiriləcək. 

3 mart saat 16:00-da baş tutacaq görüşdə spiker qismində Guy Zbarsky, Toğrul Səmədov, Rəşad Əliyev və Rauf Quliyev çıxış edəcək.

11-12 dekabr tarixlərində Berlində baş tutacaq  "Disrupt Berlin 2019" tədbirində "INNOLAND" İnkubasiya və Akselerasiya Mərkəzinin təşkilatçılığı ilə ilk dəfə Azərbaycan pavilyonu sərgilənəcək. Tədbirdə Azərbaycanı "INNOLAND"dən "Nextsale", "Botbox", "Qreact" eləcə də "Joopzy", "Wexplain" və "Wandafi" startapları təmsil edəcək.

TechCrunch Disrupt öz sahəsində dünyanın aparıcı, nüfuzlu tədbirlərindəndir. Həmçinin “TechCrunch Disrupt” dünyanın ən böyük startap tədbiri hesab olunur.

İldə 2 dəfə keçirilən bu tədbir yaz sessiyasında Amerikada San-Fransisko şəhərində, payız sessiyasında isə Almaniyanın Berlin şəhərində baş tutur.

Disrupt, ən yaxşı və parlaq startapları, investorları, hakerləri və texnologiya pərəstişkarlarını bir araya gətirir. Tədbir çərçivəsində müxtəlif “Startup Battlefield”, 24 saatlıq açıq Hackathonlar, “Startup Alley”, “Hardware Alley” müxtəlif panel müzakirələri, seminarlar, workshoplar təşkil olunur.

Tədbir dünyanın ən böyük startap portalı olan “TechCrunch.com”la yanaşı dünyanın 200-dən çox mediyasında yayımlanır.

“TechCrunch Disrupt 2019” startapçıların investisiya qazanmaları üçün də böyük imkan yaradır. Belə ki, hər il tədbir çərçivəsində investorlarla startapçıların görüşü təşkil olunur.

Bu il keçiriləcək tədbirdə iştirak edəcək startapların UIPath, Samsung və Naspers kimi böyük şirkətlərin rəhbərləri ilə, eləcə də Atomico, SoftBank və İndeksin aparıcı investorları ilə görüşmək imkanı olacaq.

Həmçinin adı keçən şirkətlərin rəhbərləri müxtəlif panel müzakirələrində startapçılarla öz uğur hekayələrini və təcrübələrini bölüşəcəklər.

“TechCrunch Disrupt 2019” tədbirində “Startup Battlefield”də iştirak edəcək və qalib gələcək 1 komanda 50.000 USD qazanacaq.

“TechCrunch Disrupt 2019” çərçivəsində müxtəlif tədbirlərlə yanaşı dünyanın müxtəlif ölkələrindən olan startaplar üçün sərgi təşkil olunacaqdır. Bu il ilk dəfə olaraq bu mötəbər tədbirdə Azərbaycan pavilyonu qurulacaq ki, bu pavilyonda Azərbaycandan olan 6 startap öz məhsullarını sərgiləyə biləcəklər. Həmçinin ölkəmizi təmsil edəcək startaplar investorlarla görüş, 50.000 dollarlıq “Startup Battlefield”də qalib olmaq uğrunda yarışda iştirak şansı əldə edəcəklər. Startaplarımız eləcə də tədbirin digər bütün imkanlarından yararlana biləcəklər.