"INNOLAND" İnkubasiya və Akselerasiya Mərkəzinin rezidenti "Nextsale" "BigCommerce" e-ticarət platforması ilə tərəfdaşlığa başlayıb. Bundan əvvəl "Nexsale" Shopify, WooCommerce, WordPress və  digər tanınmış elektron ticarət platformalarında mövcud olub. Yeni inteqrasiya "BigCommerce" istifadəçilərinə 14 günlük pulsuz sınaq müddəti ilə "Nextsale" tətbiq həllərindən faydalanmağa imkan verir.

Qeyd edək ki, "Nextsale" sayğaclar vasitəsilə onlayn mağazanıza sosial sübut və aktuallıq əlavə etməyə imkan verən platformadır.

Azərbaycan Dövlət Pedaqoji Universitetində (ADPU) tələbələrin müasir təhsil yanaşmaları ilə tanışlığı və innovativ düşüncələrinin inkişafı məqsədilə "INNOLAND" İnkubasiya və Akselerasiya Mərkəzi və ADPU ENACTUS komandasının birgə təşkilatçılığı ilə bir sıra maarifləndirici sessiyalar təşkil olunub. Sessiyalarda tanınmış mütəxəssislər tədris prosesində yeni metod və alətlərin tətbiqi, layihə əsaslı və oyun əsaslı öyrənmənin tədrisdə rolu, eləcə də rəqəmsal platformalardan istifadənin perspektivləri haqqında ətraflı məlumat veriblər. 16 may tarixində baş tutan “Online Təhsil Platforması” adlı sessiyada ADPU-nun elm və innovasiyalar üzrə prorektoru professor Asəf Zamanov açılış nitqi ilə çıxış edib. Görüşdə “Safavy” platformasının təsisçisi Könül Quliyeva onlayn təhsilin inkişaf dinamikası və tətbiq imkanları barədə təqdimatla çıxış edib. 19 may tarixində keçirilən “Gələcəyin təhsili: Layihə əsaslı öyrənməyə keçid” sessiyasında çıxış edən “Taskool” platformasının təsisçisi Nəriman Qarayev layihə əsaslı təhsil modelinin mahiyyəti və tədrisdəki effektivliyi ilə bağlı praktik nümunələr əsasında tələbələrlə müzakirə aparıb. Tədbirin açılışını ADPU ENACTUS komandasının rəhbəri Şahin Məmmədli, təqdimat hissəsini isə Aytac Abbasova həyata keçirib. 20 may tarixində baş tutan “Məktəbdə interaktiv oyunlardan istifadənin yolları” adlı sessiyanın açılışını komandanın koordinatoru Zenfira Seyidova həyata keçirib. “Bilim Bakı” mərkəzinin müəllimi Aynur Hüseynova tədrisdə oyun metodikasının tətbiqi və şagird motivasiyasının artırılmasına dair praktiki tövsiyələrini bölüşüb. Sessiyalar tələbələrin böyük marağı ilə qarşılanıb və hər üç görüş interaktiv müzakirələr, sual-cavab sessiyaları formasında keçib.

INNOLAND-in rezident startapı “Taskool” platformasının Odlar Yurdu Universitetində təqdimatı baş tutub.

İnnovativ təhsil təşəbbüslərinə həsr olunmuş görüşdə məktəb–universitet əməkdaşlığının yeni imkanları və gənclərin innovativ layihələrə cəlb olunması məsələləri müzakirə edilib. Tədbirdə universitet rəhbərliyi ilə yanaşı, “INNOLAND” İnkubasiya və Akselerasiya Mərkəzinin rəhbəri Nicat Əmiraslanov da iştirak edib və innovasiya ekosisteminin inkişafında universitet–startap əməkdaşlığının əhəmiyyətini vurğulayıb. Görüş çərçivəsində tərəflər arasında gələcək əməkdaşlıq imkanları müzakirə olunub və əməkdaşlığın inkişaf etdirilməsi məqsədilə Odlar Yurdu Universiteti ilə “Taskool” platforması arasında Anlaşma Memorandumu imzalanıb. “Taskool” platforması şagirdlərə STEAM layihələri, olimpiadalar, peşəkar kurslar və mentorluq proqramları vasitəsilə akademik portfel formalaşdırmağa imkan verir. Bu yanaşma gənclərin yalnız test nəticələri ilə deyil, bacarıq və fəaliyyətləri ilə də qiymətləndirilməsinə şərait yaradır. INNOLAND olaraq innovativ ideyaların və startap ekosisteminin inkişafına töhfə verməyə davam edirik.